Anciena kansono bone konocata ye Walonia dicas
-“Mama ka la bateleti havas gambi?
Certe filieto mea, se ne, ne avancus.”

La poeto qua inventabis ta paroli esis saja homo, o forsan vizionema, nam la bateleti havas hodie granda gambi quale araneatri qui marchas sur la aquo (Hydrometra stagnorum).
Tamen on ne devas kredar nia okuli, la bateli kun gambi ne marchas ma flugas sur la aquo. Lua pedi sub la gambi similesas ali de avioni ed uzas la aquo quale la ali uzas la aero, per la depreso sur la exter-dorso.

-He! Mentiero, cesez dicar tala stupidaji, la bateli ne marchas e ne flugas. Li nur flotacas sur la aquo.

-Tamen kelkafoye li natas quale la fishi sub la surfaco di la maro. Pro quo li ne povus flugar quale la libeluli? Videz la imajo, li havas granda gambi tre fina e ali ube la marinero povas sidar.

-Me ne kredas lo. To es nur muntajo per Photoshop.

Noto : la mentiaji di la Mentiero esas tafoye ne sat subtila por esor kredata da la lektanti.

Irgu savas ke on povas dansadar kun la volfi, ma per nur un pedo to es sat desfacila!

En Novurbo di Galejo, la konkurso internaciona de tango-danso por ti qui havas nur un gambo eventis lasta semano.
La pari de danseri devas dansadar dum tre minuti ye la muziko Arjentiniana. On judicias ne nur la bona ritmo ma anke la eleganteso di la pasi. La debutanti generale saltetas ye lua unika pedo, ma la championi savas glitar, irga dansero shovante sua partenero pos esar shovita da lu.
Ta yaro la paro gananta ne esis unigambozi naturala ma du personi qui perdis un gambo dum grava acidento. La homulo kande lu perdis la kontrolo di lua automobila veturo, e la homino nur per eroro di kururgiisto qua kredis trepanagar kuniklo.
La unogambozi di nasko havas generale avantajo, nam li havas plus pratikado kam ti qui esas nove unogamboza.
Ma la paro gananta ta yaro havas altra kapablesi, Ladislav Yurchenko esis antee championo di trisalto per un pedo e Monika Patino esis championo di glito sur glacio (sponsorizita da Glacia Kremi di Alta-Novalandia).

Noto : on devas notar ke la dansado da unogambozi esas plu chipa kam da bigambozi, nam la precio di la shui esas dufoye min chera.

Elektromoviva o gazolinomoviva veturo?
Hodie, la kompranti ne savas se li devus komprar veturo kun elektromotor o gazolinomotor.

La Societo Industriala di Esto-Novalando (S.I.E.N) publikigas la lasta semano, lore la Automoveblala Festivalo di Urbego, to qua lu presentis quale nova koncepti de modulo di transporto, solvante la dilemo.
To esas veturo kun quar roti, ma sen motoro, qua bezonas altra modulo por povar movar su.
La movanta modulo esas la kinesma roto di la karoso, quan on ligas dop la veturo di la voyajanti por pulsar. Ta kinesma roto esas sive elektromotora roto, sive klasika roto kun gazolinomotoro.

La voyajanti, segun lua bezoni, povus lokacar la motorchareto che entraprezi qui lokacigas oli .

Noto : la vereso es klare ke tala koncepti ne es nova. On trovis ya tala sistemo ye la debuto di la yarcento XX, quale pruvas lo la imajo suba.

Kelkafoye, la nova idei ne esas altro kam ancienaji. [noto di noto : to ne es nova ideo]

La humanaro plugrandesas omna yaro e necesas plu granda nutraji.
La agroindustrio bezonas nova rasi de porki por alimentar omni.
En Sudo-Novalando, la sercheri trovis uladie la moyeno por krear la bishinkoza porko (Sus scrofa bicula). Ankorfoye mal dicanta, nam per ta transformo, irga animali havas du kuli e do on povas facar quar shinki.
La avantajo por la produktanti ne es unike la porko-karno plu importanta ye irga animalo, ma anke la valoro plu granda di la karno. La shinko vendesas plu chera kam la altra parti di la bestio, do kun duopla kulo, on obtenas plus kam duopla profito.
Ka la duoplokuloza porko manjas plus kam la unokuloza? Certe yes, ma ne multe plus. Do la profito por la produktanti ne tro diminutas kauze la preci di la nutraji por porki.

La agro-sercheri di Nordo-Novalando esas hodie serchante geni por trikuloza porki por konkurencor la produkti di la Sudo-Novalando. Tamen li nur trovis la trikapoza porko, ma la kapo di porko vendesas tro chipe por valorar la peno de nutrar trikapoza bestii.
Ma konocante la geni di la trikapoza mamifero, ni povus krear trikapoza sercheri.
Noto : lore, la bona questioni esus :
– ka trikapoza serchero esus triople inteligenta kam unokapozo?
– ka la laboratorii esus plu profitebla kun trikapoza serchero vice tri unokapoza sercheri?

Esas fakto nedubitebla ke la biro inventesis ye la lando quan on nomas hodie Belgia.

La exkavuri proxim la urbeto Tourinnes-la-Grosse, pruvas lo. On trovis ibe la unesma kuvo di la mondo ube on fermentacigis la hordeo.
Tamen, quankam hodie la Belgiani esas tre superba pri to, la vereso es ke la anciena habitanti di la lando ne serchas la biro, ma nur kombusteblo por la motori.

La problemo sen solvo esis ke li ne ja inventabis la motori. Do li havas nula marketi por lia nova kombusteblo e li ne volante jetar lo, probis drinkar e ebrieskis e fine li rulis sub la tablo. Quankam ta nova drinkajo ne havas ankor vere bona gusto, la ancieni prizis esar ebria e pokope ta nova produkto vendesis ye la tota landi di la lora Europa.

Noto : La nomo es nur la transformuro di la vorto “ebrio” da ebrii qui dicis ” biro” vice “ebrio”. La linguisti havas vorti per tala transformi (perdo di la unesma “e”: permuto di la vokalo “i” e la konsonanto “r”)

On konocas la katofisho.

Ma poki savas ke la hundo anke povas similesar la kato. La vereso es ke nur en Novalando (videz noto) on trovas la katohundo, quale on dicas sat male, nam lu povas dicesar anke hundokato nam lu ne es altra kozo kam kimero unesme fabrikata da ciencisti en lua laboratorii. Ma oposite la muli qui esas sterila, la hundokato povas genitar inter su. Tamen, nur animali qui provenas de katulo e hundino povas genitar inter su, same li qui provenas de hundulo e katino.

Do hodie ni havas du nova speci di mamiferi en nova genro Caninofelis felis e Caninofelis Canus.

To es maniero de luktar kontre la granda desaparo di la speci animala.

kopulaco

noto : Novalando ne es imagina lando, nur koncepto di lando qua povas aplikesar a quaze omna lando di la mondo segun la historio. Do ne serchez sur mondomapo, ma videz cirkum vi.

La hani generale ne havas denti en la beko.

Tamen hodie en Novalando, on vidas kelka hani di la lokala raso kun kelka denti qui kreskas.
On savas de longatempe ke ta oranjea hani havas anciena geni de koloborinkuso (Coloborhynchus)
La ciencisti konsideras ke to eventas per la kauzo di la klimatochanji.
La riaktivo di la geni quin on kredis mortinta che tala ucelo di la genro galinus novalandus es destranquilonta surprizo por la ekologisti (videz la noto sube), tamen vera interesanta fenomeno por la ucelogisti.

On ja diskutas pri la nomo. On proposis galinus novalandus densae. Ma multi trovas to tro simpla. Ma ante ke on konkordas, ulu qua vidis unesme la denti che hano, Sioro Galeje, ligas sua nomo e do on havas galinus novalandus galejia.

noto : la ekologisti, quale omni savas, esas ti qui studias la retroveno di lua voci per eko, quon li nomas ekosistemo.